ຈຸດປະສົງການເຂົ້າພົບຄະນະນໍາກະຊວງວັດທະນະທໍາ ແລະ ການທ່ອງທ່ຽວ ຄັ້ງນີ້ກໍ່ເພື່ອປຶກສາຫາລືກ່ຽວກັບແຜນການຮ່ວມມືດ້ານວັດທະນະທຳ ແລະ ການທ່ອງທ່ຽວ ແລະ ບັນດາກິດຈະກຳອື່ນໆ ປະກອບສ່ວນໃນການສະເຫຼີມສະຫຼອງ ຄົບຮອບ 70 ປີ ແຫ່ງການສ້າງຕັ້ງສາຍພົວພັນການທູດລາວ-ອິນເດຍ ເປັນຕົ້ນ: ໂຄງການຟື້ນຟູວັດສີສະເກດ, ໂຄງການການບູລະນະຮັກສາຕົ້ນໂພ 3 ຕົ້ນທີ່ວັດທາດຫຼວງ, ເທດສະການຮູບເງົາ ອິນເດຍ, ພິທີນຳເອົາ ສາລິລະຂະທາດ ມາວາງສະແດງ ຢູ່ສປປ ລາວ ແລະ ບັນດາກິດຈະກຳອື່ນໆກ່ຽວຂ້ອງ ທີ່ສອງຝ່າຍ ຈະຈັດຕັ້ງປະຕິບັດຮ່ວມກັນ ຕະຫຼອດໄລຍະປີ 2026 ນີ້.​

    ທ່ານ ນາງ ສວນສະຫວັນ ວິຍະເກດ​, ລັດຖະມົນຕີ ກະຊວງວັດທະນະທໍາ ແລະ ການທ່ອງທ່ຽວ ກໍ່ໄດ້ຕີລາຄາສູງຕໍ່ການສະໜັບສະໜູນ ແລະ ຊ່ວຍເຫຼືອຂອງລັດຖະບານອິນເດຍ ແລະ ສາຍພົວພັນອັນຍາວນານລະຫວ່າງອິນເດຍ ແລະ ສປປ ລາວ ກໍ່ຄືບັນດາໂຄງການ ບູລະນະ ແລະ ປະຕິສັງຂອນ ບັນດາຮ່ອງຮອຍປະຫວັດສາດຕ່າງໆ ເຊັ່ນ: ວັດພູຈຳປາສັກ, ໂຄງການເຫັນຜົນໄວ ໃຫ້ແກ່ຂະແໜງວັດທະນະທຳ ຂອງລາວ ຊຶ່ງໃນໂອກາດດັ່ງກ່າວນີ້, ທ່ານ ລັດຖະມົນຕີ ຍັງໄດ້ສະເໜີທາງສະຖານທູດ ສືບຕໍ່ສະໜັບສະໜູນ ໃນການບູລະນະໂຄງການ ອະນຸລັກ ປັກປັກຮັກສາຮີດຄອງປະເພນີຕ່າງໆ ທາງພາກໃຕ້ ຂອງສປປ ລາວ ຕື່ມອີກ​.

    ໃນຕອນທ້າຍ, ທ່ານເອກອັກຄະລັດຖະທູດ ກໍໄດ້ສະແດງຄວາມຂອບໃຈ ຕໍ່ທ່ານ ນາງ ສວນສະຫວັນ ວິຍະເກດ​, ລັດຖະມົນຕີ ກະຊວງວັດທະນະທໍາ ແລະ ການທ່ອງທ່ຽວ ທີ່ໄດ້ໃຫ້ການຕ້ອນຮັບອັນອົບອຸ່ນ ພ້ອມທັງໃຫ້ຄໍາຍືນຍັນວ່າ ຈະນໍາເອົາທິດຊີ້ນໍາຂອງທ່ານ ໄປຈັດຕັ້ງປະຕິບັດເຂົ້າໃນແຜນກິດຈະກໍາຕ່າງໆໃຫ້ໄດ້ຮັບໝາກຜົນສູງສຸດ