ພຣະທາດ​ຫຼວງວຽງ​ຈັນ

   ພຣະທາດ​ຫຼວງວຽງ​ຈັນ ​ປະກາຍ​ສີ​ທອງຄຳ​ອັນ​ຮຸ່ງ​ເຮືອງ ຕັ້ງຢູ່​ຢ່າ​ງ​ໂດດ​ເດັ່ນ​ທີ່​ເຂດ​ບ້ານທາດຫຼວງ, ​ເມືອງ​ໄຊ​ເສດ​ຖາ,​ ເປັນ​ປູ​ຊະ​ນິຍະສະ​ຖານ​ບູຮານ​ອັນ​ເປັນ​ສັນຍາ​ລັກ​ຂອງ​ປະ​ເທດ​ລາວ, ​ເປັນ​ພຣະທາດ​ໂລກະ​ຈຸນ​ລະ​ມະນີ​ ທີ່​ບັນຈຸ​ພຣະ​ສາລິ​ກະທາດຂອງ​ພຣະພຸດທະ​ເຈົ້າ ​ແລະ ​ເປັນ​ສູນ​ລວມ​ແຫ່ງ​ຈິດ​ວິນ​ຍານ​ຂອງ​ປວງ​ຊົນ​ລາວ​ທັງ​ຊາດ​. ພຣະທາດຫຼວງ​ວຽງ​ຈັນ​ ຖືກ​ສ້າງ​ຂື້ນ​ເທື່ອ​ທຳ​ອິດ​ເມື່ອ​ປີ ພສ 236 ໂດຍ​ການ​ນຳພາ​ຂອງ​ເຈົ້າ​ເມືອງ​ວຽງ​ຈັນ ຈັນທະ​ບູລີ ປະສິດ​ທິສັກ ຫຼື ບຸລິ​ຈັນ  ແລະ ຖືກ​ຕໍ່​ເຕີມ​ສ້າງ​ຕື່ມ​ອີກ​ໃນ​ປີ ຄສ 1556 ໂດຍ​ເຈົ້າ​ໄຊ​ຍະ​ເສດ​ຖາ​ທິຣາຊ ກະສັດ​ຜູ້​ສະຖາປະນາ​ວຽງ​ຈັນ​ ເປັນ​ນະຄອນຫຼວງ​ຂອງ​ອານາຈັກ​ລາວ​ລ້ານ​ຊ້າງ. ມາ​ຮອດ​ປີ​ຄສ 1957, ລັດຖະບານ​ລາວ ​ພາຍ​ໃຕ້​ພະ​ບໍລົມ​ມະ​ຊູ​ປະຖຳຂອງ​​ ເຈົ້າ​ສີສະ​ຫວ່າງ​ວົງ ກໍ່​ໄດ້​ນຳພາ​ປະຊາຊົນ​ປັ້ນ ພະ​ບໍລົມ​ມະ​ຮູບຂອງ​ ເຈົ້າ​ໄຊ​ຍະ​ເສດ​ຖາ​ທິຣາຊ ປະດິດສະຖານ​ໄວ້ ​ຢູ່ໜ້າ​ທາງ​ເຂົ້າ​ພະທາດ​ດ້ານ​ຕາ​ເວັນ​ຕົກ ​ເພື່ອ​ເປັນ​ອະນຸສາວະລີ​ທີ່​ພະ​ອົງ​ໄດ້​ສ້າ​ງພະທາດ​ຫຼວງ​ ຂື້ນມາ​ເປັນ​ທີ່​ສັກກະ​ລະ​ບູຊາ​ຈົນ​ຮອດ​ປະຈຸ​ບັນ. ພຣະທາດຫຼວງ​ສູງ 45 ແມັດມີ​ໃບ​ສິມ​ມາ​ອອ້ມ 228 ໃບ, ມີ ບໍລິວານ (ທາດ​ນ້ອຍ) ອ້ອມຮອບ 30 ອົງ​ເອີ້ນວ່າ​ປະລະມິ​ສານ​ສິບ​ທັດ, ຕີນພຣະ​ທາດ​​ແຕ່​ດ້ານ​ຕາ​ເວັນ​ອອກ​ ຫາ​ດ້ານ​ຕາ​ເວັນ​ຕົກ​ຍາວ 69 ແມັດ, ​ແຕ່​ດ້ານ​ເໜືອ​ຫາ​​ໃຕ້​ຍາວ 68 ແມັດ  ແລະ ​ມີ​ກົມ​ມະ​ລຽນ​ດ້ານ​ນອກ​ອອ້ມພຣະທາດຫຼວງ​ ແຕ່​ລະ​ດ້ານ​ຍາວ 91,75 ແມັດ. ໃນ​ວັນ​ເພັງ​ເດືອນສິບ​ສອງ​ຂອງ​ທຸກໆ​ປີ (​ໄລຍະ​ເດືອນ ຕຸລາ ​- ເດືອນ​ພະຈິກ) ​ປະ​ຊົນ​ລາວ​ຈາກ​ທຸກ​ສາລະ​ທິດ ຈະ​ພາກັນ​ເດີນທາງ​ມາສະ​ເຫຼີ​ມສະຫຼອງ​ບຸນ​ນະມັດສະກາ​ນພຣະທາດຫຼວງ ​ເຊິ່ງ​ເປັນ​ບຸນມະ​ໂຫລານ​ທີ່​ໃຫຍ່​ທີ່​ສຸດ​ໃນ​ປະ​ເທດ​ລາວ ​ຖືກ​ຈັດ​ຂື້ນ​ເປັນ​ເວລາ 7 ມື້ 7 ຄືນ ​ພ້ອມ​ການສະ​ແດງ​ມະ​ໂຫລີ, ສິລະ​ປະ-ວັນນະຄະດີ ແລະ ງານ​ວາງສະ​ແດງ​ສິນ​ຄ້າ​ ຈາກ​ຫຼາກ​ຫຼາຍ​ຫ້າງ​ຮ້ານ. ບຸນ​ພະທາດ​ຫຼວງ​ສະ​ແດງ​ໃຫ້​ເຫັນ​ເຖິງ​ວັດທະນະທຳ ​ແລະ ຮີດຄອງ​ປະ​ເພນີ ​ອັນ​ດີງາ​ມຂອງ​ຊາວ​ພຸດ​ ກໍ່​ຄື​ຊາວ​ລາວ​ທັງ​ຊາດ ​ໂດຍ​ມີ​ພິທີ​ສຳຄັນ​ທາງ​ສາດສະໜາ​ເຊັ່ນ: ພິທີ​ແຫ່​ຜາສາດ​ເຜີ້ງ, ວຽນທຽນ​ ​ແລະ ຕັກບາດ​ຖວາຍ​ທານ ​ເຊິ່ງມີ​ພະສົງ​ຈາກ​ທົ່ວ​ທຸກ​ແຂວງ​ໃນ​ປະ​ເທດ​ລາວ​ ເດີນທາງ​ມາ​ຮ່ວມ ​ແລະ ພາຍຫລັງ​ພິທີ​ຕັກບາດ ​ກໍ່​ມີ​ການ​ແຂ່ງຂັນ​ຕິ​ຄີ ເຊິ່ງ​ເປັນ​ກິລາ​ພື້ນ​ເມືອງ ທີ່​ຈັດ​ຂື້ນ​ໃນ​ທຸກໆ​ປີ​ໄລຍະ​ບຸນ​ດັ່ງກ່າວ.

       ຕົກມາປີ 2016 -2017 ພັກ ແລະ ລັດຖະບານ ສາທາລະນະລັດ ປະຊາທິປະໄຕ ປະຊາຊົນລາວ ໄດ້ຕົກລົງປະຕິສັງຂອນ ແລະ ຍົກຍອດຄຳຂຶ້ນສູ່ຈອມພະທາດຫລວງ ແລະ ພະທາດປາລະມີ 32 ທາດ ສຳເລັດ, ເຮັດໃຫ້ພະທາດຫລວງ ເບັງປາລາມີ ແລະ ຄວາມສວຍງາມຍິງຂຶ້ນ.

ຫໍ​ທຳ​ມະ​ສະພາ

ຫໍ​ທຳ​ມະ​ສະພາ ຕັ້ງ​ຢູ່​ບໍລິ​ເວ​ນວັດ​ທາ​ດຫຼວງ​ເໜືອ ​ເຊິ່ງຢູ່​ທາງ​ທິດ​ເໜືອ​ຂອງ​ພຣະທາດ​ຫຼວງ​ວຽງຈັນ. ຫໍ​ທຳ​ມະ​ສະພາ ​ຖືກ​ສ້າງຕັ້ງຂຶ້ນ ດ້ວຍ​ສະຖາປັດຕະຍະກຳ​ອັນ​ງົດ​ງາມ​ແບບ​ສິນ​ລະ​ປະ​ລາຍ​ລາວ ​ເຊິ່ງມີ​ຂະໜາດ​ໃຫຍ່ ​ແລະ ກວ້າງຂວາງ​ຖືກ​ໃຊ້​ເປັນ​ສະ​ຖານ​ທີ່​ປະກອບ​ພິທີກຳ​ຕ່າງ​ໆທາງ​ສາດສະໜາຂອງ​ພຣະສົງ.

ປະຕູ​ໄຊ

ປະຕູ​ໄຊ ຫລື ຊື່​​ເດີມ​ເອີ້ນ​ວ່າ “ອະນຸສາວະ​ລີ​ໄຊຊະນະ” ມັກ​ຖືກ​ປຽບທຽບ​ໂດຍ​ນັກ​ທ່ອງ​ທ່ຽວວ່າ​ເປັນ “ອາກ​ເດີ ທຣີອົມ” (ຢູ່​ນະຄອນ​ປາຣີ ປະ​ເທດ​ຟຣັ່ງ) ຂອງ​ລາວ​ເພາະວ່າ ​ມີ​ລັກສະນະ​ໂດດ​ເດັ່ນ​ຕັ້ງຢູ່​ໃຈກາງ​ນະຄອນຫລວງ​ວຽງຈັນ ບໍລິ​ເວນ​ຕອນ​ກາງຂອງ​ຖະໜົນລ້ານ​ຊ້າງ (ຄົນ​ສະ​ໄໝກ່ອນ​ມັກ​​ເອີ້ນ​ກັນ​ວ່າ​ ຊອງ ​ເອລິ​ເຊ້ ​ເປັນ​ຖະໜົນຢູ່​ໃນ​ປາຣີ​ເຊັ່ນ​ກັນ). ປະຕູ​ໄຊ​ຖືກ​ສ້າງ​ຂຶ້ນນັບ​ແຕ່​ປີ ຄສ 1957-1962 ​ເພື່ອ​ເປັນ​ອານຸສອນ​ໃຫ້​ແກ່​ການ​ປະ​ກາດ​ເອກະລາດ​ຂອງ ສປປ ລາວ ອອກ​ຈາກ​​ແອກ​ປົກຄອງ​ຂອງ​ລ່າ​ເມື​ອງຂຶ້ນຟຣັ່ງ ​ໂດຍ​ສ້າງ​ຕາມ​ສັດສ່ວນ​ເລກ​ຕຳລາ​ອັນ​ສຳຄັນ​ຂອງ​ຊາວ​ພຸດ ຄື: 3-7-9. ຮູບຊົງ​ດ້ານ​ເທິງ​ຂອງ​ປະຕູ​ໄຊ ​ແມ່ນ​ມີ​ລັກສະນະ​ຄ້າຍ​ຄື​ກັບ​ຜາສາດ ທັດ​ສ໌ມາ​ຮານ ທີ່​ຢູ່​ປະ​ເທດ​ອິນ​ເດຍ ​ແລະ ​ດ້ານ​ໃນ​ ຖືກ​ປະ​ດັບ​ປະດາ​ດ້ວຍ​ສິນ​ລະ​ປະ​ລວດລາຍອັນ​ເປັນ​ເອກະລັກ​ຂອງ​ລາວ ທີ່ມີ​ສີສັນ​ງົດ​ງາມ ລວມທັງ​ຮູບ​ປັ້ນນາງ​ກິນ​ນາລີ. ປະຕູ​ໄຊ​ມີ​ຄວາມ​ສູງ 49 ​ແມັດ ດັ່ງນັ້ນ ນັກ​ທ່ອງ​ທ່ຽວທີ່​ມາ​ທ່ຽວຊົມ​ຈຶ່ງ​ສາມາດ​ຂຶ້ນ​ໄປ​ສູ່​ສຸດ​ ເພື່ອ​ຊົມ​ທິວ​ທັດ​ອັນ​ສວຍ​ງາມ​ຂອງ​ຕົວ​ເມືອງ​ໃນ ນະຄອນຫລວງວຽງຈັນ. ຢູ່​ບໍລິ​ເວນ​ດ້ານ​ລຸ່ມ ​ກໍ​ເປັນ​ເດີນ​ກວ້າງ ​ປະກອບ​ໄປ​ດ້ວຍ​ອ່າງ​ນ້ຳພຸ, ດອກ​ໄຟ​ສີ ​ແລະ ດອກ​ໄມ້​ຫລາຍ​ສະ​ນິດ-​ຫລາຍ​ແນວ​ພັນ ທີ່​ສົ່ງ​ກິ່ນ​ອັນ​ຫອມ​ຫວນ ແລະ ສີສັນ​ສົດ​ໃສ​ຕະການ​ຕາ. ດ້ອຍ​​ເຫດ​ນີ້ ປະຕູ​ໄຊ ຈຶ່ງ​ເປັນ​ອີກ​ສະຖານ​ທີ່ທ່ອງ​ທ່ຽວໜຶ່ງ ທີ່​ລື​ຊື່​ໃນ​ນະຄອນຫລວງ​ວຽງຈັນ ກໍ​ຄື​ໃນ​ປະ​ເທດ​ລາວ​ເຮົາ​ ​ເຊິ່ງສາມາດ​ດຶງ​ດູດ​ນັກ​ທ່ອງ​ທ່ຽວ​ເປັນ​ຈຳນວນ​ຫລວງ​ຫລາຍ​ໃຫ້​ເຂົ້າມາ​ທ່ຽວຊົມ ແລະ ຖ່າຍຮູບ​ເກັບ​ພາບ​ໄວ້​ເປັນ​ທີ່​ລະ​ນຶກ​ ເພື່ອ​ສະ​ແດງ​ໃຫ້​ຮູ້​ວ່າ​ໄດ້​​ເດີນທາງ​ມາ​ຮອດ ນະຄອນຫລວງ​ວຽງຈັນ​ແລ້ວ. (ທ່ານ​ສາມາດ​ຂຶ້ນ​ໄປ​ຊົມ​ດ້ານ​​ເທິງ​ຂອງ​ປະຕູ​ໄຊ​ໄດ້​ທຸກ​ມື້​ເວລາ 8:00 - 16:00​ ​ໂມງ).

ໂຮງ​ກາ​ຍະ​ສິນ

ໂຮງ​ກາ​ຍະ​ສິນ ຖືກ​ສ້າງ​ຂຶ້ນ​ໃນ​ປີ 1986 ຢູ່​ທີ່​ຖະໜົນ​ເຈົ້າອາ​ນຸວົງ, ບ້ານ​ສະຫວ່າງ, ​ເມືອງຈັນທະ​ບູລີ. ສະຖານ​ທີ​ແຫ່ງ​ນີ້ ມີ​ຊື່ສຽງຫລາຍ ​ແລະ ​ເປັນ​ທີ່​ນິຍົມ​ສຳ​ລັບ​ຈັດການ​ສະ​ແດງ ​ທາງ​ດ້ານ​ກາ​ຍະ​ສິນຍັງ​ຖືກ​​ໃຊ້​ເຂົ້າ​ໃນ​ການ​ສະ​ແດງ​ສິນ​ລະ​ປະ-ວັນນະ​ຄະນະ​ດີ​ຕ່າງໆ (ຮອງ​ເພັງ, ຂັບ-ລຳ ​ແລະ ຟ້ອນ), ລະຄອນ, ການ​ແຂ່ງຂັນ​ສົກ​ມວຍ ​ແລະ ກິດຈະກຳ​ອື່ນໆ ​ເນື່ອງ​ໃນ​ວັນ​ສຳຄັນຂອງ​ຊາດ, ​ເຊິ່ງຈະ​ມີ​ການ​ໂຄສະນາ-ປະຊາສຳພັນ​ໃຫ້​ທ່ານ​ຮັບ​ຊາບ​ລ່ວງໜ້າກ່ຽວກັບ​ວັນ, ​ເວລາ ​ແລະ ລາຍການ​ສະ​ແດງ​ຜ່ານ​ທາງ​ໂທລະພາບ, ວິທະຍຸ ຫລື ໜັງສື​ພິມ.

ວັດ​ສີ​ເມືອງ

ວັດ​ສີ​ເມືອງ ​ເປັນ​ບ່ອນ​ຕັ້ງຂອງ​ເສົາ​ຫລັກ​ເມືອງ ຢູ່​ເຂດ​ບ້ານສີ​ເມືອງ, ​ເມືອງ ຈັນທະ​ບູລີ ​ເຊິ່ງມີ​ປະຫວັດ​ອັນ​ເກົ່າ​ແກ່ ​ທີ່​ເລົ່າ​ຂານ​ສືບ​ຕໍ່​ກັນ​ມາ​ວ່າ ​ໃນ​ສະ​​ໄໝກ່ອນ ຕອນ​ທີ່​ຊາວ​ເມືອງ​ພວມ​ເຮັດ​ພິທີ​ປັກ​ຫລັກ​ເມືອງ​ຢູ່​ນັ້ນ ມີ​ແມ່ຍິງ​ຄົນໜຶ່ງຊື່ວ່າ​ ນາງ ສີ ​ເຊິ່ງກຳລັງ​ຖືພາ​ໄດ້​ສະຫລະ​ຊີບ​ໂດດ​ລົງ​ໄປ​ໃນ​ຂຸມ​ນັ້ນ, ນາງ​ໄດ້​ຖືກ​ຝັງ​ໄປ​ພ້ອມ​ຫລັກ​ເມືອງ ​ແລະ ກາຍ​ເປັນ​ຜີ​ຫລັກ​ເມືອງ ຈຶ່ງ​ເປັນ​ທີ່ມາ​ຂອງ​ຊືວັດ​ສີ​ເມືອງ​ແຫ່ງ​ນີ້. ຍ້ອນ​ວ່າ​ວັດ​ສີ​ເມືອງ​ເປັນ​ສະຖານ​ທີ່​ສັກສິດ ​ຈຶ່ງ​ໄດ້​ກາຍ​ເປັນ​ທີ່​ເພິ່ງ​ທາງ​ໃຈ​ໃຫ້​ແກ່​ຊາວ​ລາວ ​ແລະ ​ເປັນ​ສະຖານ​ທີ່ ທີ່​ຊາວ​ຕ່າງ​ຊາດ​ໃຫ້​ຄວາມ​ສົນ​ໃຈ​ເຂົ້າມາ​ສຶກສາ ​ແລະ ທ່ຽວຊົມ​ເປັນ​ຈຳນວນ​ຫຼວງຫຼາຍ. ປັດຈຸບັນ, ປະຊາຊົນ​ທັງ​ພາຍ​ໃນ ​ແລະ ຕ່າງປະ​ເທດ​ໄດ້​ພາກັນ​ເຂົ້າມາ​ສັກກະ​ລະ​ບູຊາ-ກາບ​ໄຫວ້​ວັດ​ສີ​ເມືອງ​ທຸກໆມື້ ​ໂດຍ​ສະ​ເພາະ​ວັນ​ອັງຄານ ​ແລະ ວັນ​ສິນ​ ຄົນ​ສ່ວນ​ໃຫຍ່​ ແມ່ນ​ມັກ​ມາ​ຂໍ​ພອນ, ເສຍ​ເຄາະ ບູຊາ​ໂຊກ, ມາ​ບະ-ມາ​ບົນ​ນຳ​ເຈົ້າ​​ແມ່​ສີ​ເມືອງ​ ໃນ​ສິ່ງ​ທີ່​ຕົນປາດ​ຖະໜາ ​ແລະ ​ເມື່ອ​ສົມ​ຫວັງ​​ແລ້ວ​ກໍ​ມາ​ແກ່​ບະ​ຢູ່​ທີ່ນີ້ ຕາມ​ຄວາມ​ເຊື່ອ​ຂອງ​​ແຕ່ລະຄົນ. ທຸກໆປີ​ໃນ​ມື້​ຂຶ້ນ 15 ຄ່ຳເດືອນ 12 ຂອງ​ລາວ​ ​ເຊິ່ງກົງ​ກັບ​ມື້ບຸນ​ນະມັດສະການ​ພະທາດ​ຫລວງ ຈະ​ມີ​ພິທີ​ແຫ່​ປະສານ​ເຜິ​ງ ​ເຊິ່ງ​ເລີມ​ຕົ້ນ​ແຮ່ຈາກ​ວັດ​ສີ​ເມືອງ​ແຫ່ງ​ນີ້​ໄປ​ຫາ ພຣະທາດຫລວງ​ວຽງຈັນ. ວັດ​ສີ​ເມືອງ​ເປີດ​ໃຫ້​ຄົນ​ເຂົ້າທ່ຽວຊົມ ​ແລະ ກາບ​ໄຫວ້​ບູຊາ​ທຸກມື້ ຕັ້ງ​ແຕ່ຕອນ​​ເຊົ້າມືດ​ຈົນ​ເຖິງ​ຄ່ຳ.

ຫໍ​ຫລັກ​ເມືອງ

ຫໍ​ຫລັກ​ເມືອງ ກົງກັນ​ຂ້າມກັບ​ວັດ​ສີ​ເມືອງ ​ແມ່ນ​ຫໍ​ຫລັກ​ເມືອງ ​ເຊິ່ງ​ເປັນ​ບ່ອນ​ປົກ​ປັກ​ຮັກສາ​ຮ່ອງຮອຍ​ມໍຣະດົກ​ທາງ​ປະຫວັດສາດ​ທີ່​ຖືກ​ຄົ້ນພົບ​ຢູ່​ສະຖານ​ທີ່​ແຫ່ງ​ນີ້ ​ໂດຍ​ນັກ​ບູຮາ​ນະ​ຄະດີ​ໄດ້​ທຳ​ການຄົ້ນຄວ້າ​ວິ​ໃຈ​ແລ້ວ​ພົບ​ວ່າ ວັດຖຸ​ບູຮານ​ນີ້​ແມ່ນ​ເປັນ​ວັດຖຸ​ທີ່​ປະກອບ​ເຂົ້າ​ໃນ​ພິທີການ​ກໍ່ສ້າງ​ເສົາ​ຫລັກ​ເມືອງ​ວຽງຈັນ​ໃນ​ສະ​ໄໝກ່ອນ​ ໂດຍ​ໄດ້​ພົບ​ຫີນ​ຫລັກ​ເມືອງ​ຈຳນວນ473 ຫລັກ ສ່ວນ​ໃຫຍ່​ຟອກ​ດ້ວຍ​ຄຳປິວ ​ແລະ ​ແກະສະຫລັກ​ເປັນ​ລວດ​ລາຍ​ງົດ​ງາມ. ສິ່ງ​ທີ່​ສຳຄັນ​ທີ່​ສຸດ​ແມ່ນ​ເພິ່ນ​ໄດ້​ຄົ້ນ​ພົບ​ສີ​ລາ​ຈາລຶກ ໜຶ່ງ​ແຜ່ນ​ທີ່​ໄດ້​ລະບຸ​ເລີກ​ຍາມ​ກົງ​ກັບ​ມື້​ວັນ​ຈັນ, ​ແຮມ 10 ຄ່ຳເດືອນ 3, ຈສ 901 ປີ​ກຸນ​ ປີ​ກັດ​ໃຄ້​ ເຊິ່ງກົງ​ກັບ​ວັນ​ທີ 16 ກຸມພາ ຄສ 1540 ຣາຊະ​ການ​ຂອງ​ພະ​ເຈົ້າ​ໂພທິ​ຊະຣາຊ ​ເຊິ່ງ​ເປັນ​ບິດາ​ຂອງ​ເຈົ້າ​ໄຊ​ຍະ​ເຊ​ດຖາ​ທິຣາຊ. ກຸ່ມ​ຫີນ​ຫລັກ​ເມືອງ​ດັ່ງກ່າວ​ຖືກ​ຈັດ​ວາ​ງ​ໄວ້​ເປັນ 3 ກຸ່ມ​ຫ່າງ​ກັນ​ປະມານ 1,5 ​ແມັດ​ ​ແລະ ຫໍ​ຫລັກ​ເມືອງ​ທີ່​ຫາ​ກໍ່ສ້າງ​ຂຶ້ນມາ​ໃໝ່ນີ້​ແມ່ນ​ກວມ​ເອົາ​ຫິນ​ເສມາ​ທັງ 3 ກຸ່ມ ​ແລະ ຕັ້ງຢູ່​ບ່ອນ​ເກົ່າ​ແຕ່​ເດີມ​ເພື່ອ​ເປັນ​ການ​ຮັກສາ​ຄວາມໝາຍອັນ​ສັກສິດ​ທີ່​ບັນພະ​ບູລຸດ​ໄດ້​ກຳນົດ​ໄວ້ ​ແລະ ປະຕິບັດ​ຕາມ​ຮີດ​ເກົ່າ​ຄອງ​ເດີມ​ທີ່​ມີ​ມາ​ແຕ່​ບູຮານ.

ຫໍພະ​ແກ້ວ

ຫໍພະ​ແກ້ວ ຕັ້ງຢູ່​ເຂດ ບ້ານ​ຊຽງຍືນ, ​ເມືອງຈັນທະ​ບູລີ, ກົງ​ກັນຂ້າມ​ກັບ ​ວັດ​ສີສະ​ເກດ ​ແລະ ​ໄກ້​ກັບ​ພະຣາຊະ​ວັງ​​ເກົ່າ (ຫໍຄຳ) ​ເຊິ່ງປະຈຸ​ບັນ​ເປັນ​ສຳນັກງານ​ປະທານ​ປະ​ເທດ. ສະ​ໄໝກ່ອນ ຫໍພຣະ​ແກ້ວ ຕັ້ງຢູ່​ພາຍ​ໃນ​ວັດ​ເກົ່າ​ແກ່​ໃນ​ເຂດ​ພຣະຣາຊະ​ວັງ ຖືກ​ສ້າງ​ຂຶ້ນ​ໂດຍ​ພະ​ເຈົ້າ​ໄຊ​ຍະ​ເຊ​ດຖາ​ທິລາຊ ​ໃນ​ລະຫວ່າງ​ປີ ຄສ 1565-1779 ​ເຊິ່ງ​ເປັນ​ບ່ອນ​ປະດິດສະຖານ​ຂອງ “ພຣະ​ແກ້ວ​ມໍຣະກົດ” ​ເຖິງ​ແມ່ນ​ວ່າ​ໃນ​ປະຈຸ​ບັນຈະ​ບໍ່​ມີ​ພະ​ແກ້ວ​ມໍຣະກົດ​ແລ້ວ​ ອັນ​ເນື່ອງ​ມາ​ຈາກ​ເຫດການ​ທາງປະຫວັດສາດ​ທີ່​ຜ່ານ​ມາ, ​ແຕ່​ຫໍພະ​ແກ້ວ​ກໍ​ຍັງ​ຄົງ​ເປັນ​ທີ​ສັກກະ​ລະ​ບູຊາ​ຂອງ​ຊາວ​ລາວ ຍ້ອນ​ເປັນ​ແຫ​ລ່ງຮວບ​ຮວມວັດຖຸ​ບູຮານ​ອັນ​ສຳຄັນ ​ແລະ ລ້ຳຄ່າ​ເປັນຕົ້ນ​ແມ່ນ ພະພຸດທະ​ຮູບ​ປາງ​ຕ່າງໆ ທີ່​ຫລໍ່​ຈາກ​ທອງ​​ແດງ, ສີ​ລາ​ຈາກ​ລຶກ ​ແລະ ອື່ນໆ​ເມື່ອ​ຍ່າງ​ເລາະ​ຊົມ​ບໍລິ​ເວນ​ພາຍ​ໃນ​ສະຖາປັດຕະຍະກຳ​ອັນ​ສວຍ​ງາມ​ນີ້ ທ່ານ​ຈະ​ຮູ້ສຶກ​ໄດ້​ເຖິງ​ຄວາມ​ສະຫງົບ​ຮົ່ມ​ເຢັນ​ທີ່​ແຕກ​ຕ່າງ​ຈາກ​ບ່ອນ​ອື່ນໆ. ຫໍພຣະ​ແກ້ວ​ເປີດ​ໃຫ້​ເຂົ້າທ່ຽວຊົມ​ທຸກ​ມື້ ​ເວລາ 8:00-17:00 ໂມງ.

ວັດ​ສີສະ​ເກດ

ວັດ​ສີສະ​ເກດ ​ເປັນ​ວັດ​ທີ່​ມີ​ຄວາມ​ສຳຄັນ​ທາງ​ປະຫວັດສາດ ​ເພາະວ່າ​ເປັນ​ວັດ​ດຽວ ທີ່​ລອດ​ພົ້ນຈາກ​ການ​ຈູດ​ເຜົາ​ທຳລາຍ​ຂອງ​ສັກ​ດີນາ​ຕ່າງ​ດ້າວ ​ທີ່​ມາ​ຮຸກ​ຮານ​ລາວ ​ໃນ​ລະຫວ່າງ​ປີ ຄສ 1827-1828. ວັດ​ສີສະ​ເກດ​ໄດ້​ຖືກ​ສ້າງ​ຂຶ້ນ​ໃນ​ປີ ຄສ 1818​ ​ໂດຍ​ການ​ນຳພາ​ຂອງ​ເຈົ້າອານຸວົງ, ກະ​ສັດ​ອົງ​ສຸດ​ທ້າຍ​ ຂອງຣາຊະ​ວົງວຽງຈັນ ​ແລະ ມີ​ຄວາມ​ພິ​ເສດ​ທີ່​ສຸດ​ ​ເນື່ອງ​ຈາກ​ວ່າ ​ເປັນ​ວັດ​ທີ່ບັນຈຸ​ຫໍ​ໄຕ​ປີດົກ, ກຸດຕິ​ຂອງ​ເຈົ້າ​ເພັດຊະຣາຊ ​ແລະ ຢູ່​ຕາມ​ຝາ​ດ້ານ​ໃນ​ຂອງ​ສິມ ​ກໍ່​ມີ​ຮູ​ບ​ແຕ້ມ​ລວດລາຍງົດ​ງາມ. ບໍລິ​ເວນ​ວັດ ​ມີ​ກົມ​ມະລຽນອ້ອມ​ສີ່​ດ້ານ, ​ແຕ່​ລະ​ດ້ານ ​ມີ​ພຣະພຸດທະ​ຮູບ​ນ້ອຍ​ທີ່​ເຮັດດ້ວຍ​ປະທາຍ​ເພັດ ລວມມີ 120 ອົງ. ສ່ວນ​ຢູ່​ຂ້າງ​ອຸ​ໂບສົດ​ມີ​ພຣະພຸດທະ​ຮູບ​ປະທານ​ອົງ​ໃຫຍ່​ອັນ​ສັກສິດ, ຢູ່​ຂ້າງ​ກ້ຳຊ້າຍ ​ແລະ ຂວາ​ຂອງ​ພຣະປະທານ ກໍ​ມີ​ພຣະພຸດທະ​ຮູບ​ທອງ​ຫລໍ່ ປາງ​ຫ້າມ​ຍາດ 2 ອົງ ​ເຊິ່ງ​ເຈົ້າອານຸວົງ ​ໄດ້​ສ້າງ​ໄວ້​ເທົ່າ​ກັບ​ເລົ່າ​ຄີງ​ຂອງ​ເພິ່ນ​ເອງ. ນອກ​ນັ້ນ ຢູ່​ຕາມ​ຊ່ອງ​ຝາ​ດ້ານ​ໃນ​ສິມ ​ກໍ​ຍັງ​ມີ​ພຣະພຸດທະ​ຮູບອົງ​ນ້ອຍໆ ລວມທັງໝົດ 2052 ອົງ ​ເຊິ່ງ​ໃນ​ນັ້ນ​ເຮັດ​ດ້ວຍ​ເງິນ​ບຸ 276 ອົງ. (​ເວລາ​ເປີດ​ໃຫ້​ເຂົ້າທ່ຽວຊົມ​ແມ່ນ​ເລີ່​ມ​ແຕ່ 8:00-17:00 ​ໂມງ ຂອງ​ທຸກໆມື້)

ແຫຼ່ງທ່ອງທ່ຽວທໍາມະຊາດອ່າງເກັບນ້ຳເຂື່ອນໄຟຟ້ານໍ້າອູ 6.

ອ່າງເກັບນ້ຳ ໄຟຟ້ານໍ້າອູ 6 ຕັ້ງຢູ່ທິດຕາເວັນອອກສ່ຽງເໜືອຂອງ ແຂວງຜົ້ງສາລີ ຫ່າງຈາກເທດສະບານແຂວງປະມານ 35 ກິໂລແມັດ, ເປັນສະຖານທີ່ທ່ອງທ່ຽວທາງທຳມະຊາດແຫ່ງໜຶ່ງທີ່ມີຄວາມສວຍງາມທາງທິວທັດທຳມະຊາດ, ຄວາມອຸດົມສົມບູນຂອງສັດນາໆພັນໃນພື້ນນໍ້າ ແລະ ມີໝູ່ບ້ານປະຊາຊົນບັນດາເຜົ່າທີ່ອາໄສຕາມໜ້າອ່າງ; ດັ່ງນັ້ນທາງພະແນກ ຖວທ ແຂວງ ແລະ ຫ້ອງການ ຖວທ ເມືອງຜົ້ງສາລີ ໄດ້ວາງແຜນເພື່ອພັດທະນາ ການທ່ອງທ່ຽວໃນຂົງເຂດນີ້ໂດຍອີງໃສ່ 6 ທາງອອກຂອງແຂວງຜົ້ງສາລີ ແລະ ໃນນັ້ນກໍ່ປະຕິບັດຕາມທາງອອກທີ່ 5 ຫັນການທ່ອງທ່ຽວເປັນອຸດສາຫະກຳ ໃນນີ້ກໍ່ເພື່ອສ້າງກິດຈະກໍາໃຫ້ພາກສ່ວນຜູ້ປະກອບການ ບໍລິການຮ້ານອາຫານ, ການປະມົງ, ການບໍລິການຂີ່ເຮືອຊົມພາບທິວທັດ  ໜ້າເຂື່ອນ ແລະ ສ້າງບ້ານໃກ້ຄຽງໃຫ້ເປັນບ້ານໂຮມສະເຕ (Home stay) ເພື່ອຮອງຮັບນັກທ່ອງທ່ຽວທີ່ຈະໄປທ່ຽວຊົມ ແລະ ພັກແຮມ, ໃນນີ້ ກໍ່ເພື່ອສ້າງວຽກເຮັດງານທຳ ແລະ ສ້າງລາຍໄດ້ເສີມໃຫ້ແກ່ຊຸມຊົນໂດຍກົງ. ຂະນະດຽວກັນນີ້, ກໍໄດ້ກໍ່ສ້າງພື້ນຖານໂຄງລ່າງ ເພື່ອສ້າງສິ່ງອຳນວຍຄວາມສະດວກດ້ານການບໍລິການຕິດພັນກັບຄວາມອຸດົມສົມບຸນທາງດ້ານຊັບພະຍາກອນທຳມະຊາດ ແລະ ວັດທະນະທຳ ອັນດີງາມຂອງປະຊາຊົນບັນດາເຜົ່າ  ອັນໄດ້ເຮັດໃຫ້ວຽກງານການທ່ອງທ່ຽວ ນັບມື້ມີທ່າຂະຫຍາຍຕົວເພີ່ມຂຶ້ນເລື້ອຍໆ ເປັນທີ່ດຶງດູດໃຫ້ແກ່ນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າມາທ່ຽວອ່າງເກັບນ້ຳໄຟຟ້ານໍ້າອູ 6 ນັບມື້ນັບຫຼາຍຂຶ້ນ, ໃນນີ້ ໜ້າເຂື່ອນມີຮ້ານອາຫານ ແລະ ຮ້ານກິນດື່ມ 3 ແຫ່ງ ພ້ອມທັງມີເຮືອບໍລິການຂົນສົ່ງນຳພ້ອມ, ບັນດາທຸລະກິດເຫລົ່ານີ້ ແມ່ນທຸລະກິດແບບຄອບຄົວ ບໍລິການແບບປະຖົມປະຖານ ເຊິ່ງສາມາດຮັບຮອງນັກທ່ອງທ່ຽວໄດ້ໂດຍພື້ນຖານ.

ສວນຊາຫຼັກ 4 (ບ້ານ ສາຍລົມ).

ສວນ​ຊາ​ສາຍລົມ (ຫຼັກ 4) ມີທີ່ຕັ້ງຢູ່ທິດເໜືອຂອງເທດສະບານເມືອງຜົ້ງສາລີ ຕັ້ງຢູ່ບ້ານສາຍລົມ ຫ່າງຈາກເທດສະບານປະມານ 4 ກິໂລແມັດ ເປັນສວນຊາສະນິດນ້ອຍ, ເຊິ່ງ​ເປັນ​ສວນ​ຊາ​ທີ​ມີ​ຄວາມ​ສວຍ​ງາມດ້ວຍການຕັດ​ຕົກ​ແຕ່ງເປັນຖັນແຖວສວຍງາມເປັນໜ້າທ່ຽວຊົມ, ສວນຊາມີເນື້ອທີ່ທັງໝົດ 22 ເຮັກຕາ, ມີຕົ້ນຊາປະມານ 8,800 ຕົ້ນ, ມີອາຍຸ 15-16 ປີ.

ຕົວເມືອງເກົ່າຜົ້ງສາລີ (ບ້ານຜົ້ງສາລີ ແລະ ບ້ານຕະຫຼາດວິໄລ).

ເມືອງຜົ້ງສາລີ ຕັ້ງຢູ່ໃຈກາງເທດສະບານຂອງແຂວງ ເຊິ່ງເປັນໜຶ່ງໃນ 7 ເມືອງ ຂອງແຂວງຜົ້ງສາລີ. ແຂວງຜົ້ງສາລີເວົ້າລວມເວົ້າສະເພາະ ເທດສະບານເມືອງຜົ້ງສາລີ ມີທ່າແຮງທາງດ້ານທີ່ຕັ້ງພູມສາດ ເປັນທາງຜ່ານ ເຂົ້າ-ອອກ ປະເທດ ສສ ຫວຽດນາມ,  ສປ ຈີນ ແລະ ອອກສູ່ແຂວງອຸດົມໄຊ ເຖິງນະຄອນຫຼວງວຽງຈັນ. ນອກນັ້ນ ຍັງມີວັດທະນະທໍາ ຮີດຄອງປະເພນີອັນຫຼາກຫຼາຍຂອງບັນດາເຜົ່າ ເຊິ່ງເປັນເອກະລັກອັນສະເພາະຂອງຕົນ, ມີທັດສະນິຍະພາບທີ່ສວຍງາມ, ມີພູຜາປ່າດົງທີ່ຕຶບໜາ, ມີພູສູງທີ່ສາມາດແນມເຫັນທີວທັດທໍາມະຊາດ, ຕົວເມືອງ ແລະ ໝູ່ບ້ານນ້ອຍໃຫຍ່ ທີ່ຢັ່ງຍາຍຢູ່ຕາມເປີ້ນພູ ແລະ ຮ່ອມພູ, ມີອາກາດທີ່ສົດຊື່ນ, ມີວັດຖຸບູຮານ, ປູສະນິຍະຖານທີ່ເກົ່າແກ່ເຊັ່ນ: ພູຟ້າ, ສວນຊາ 400 ປີ, ສວນຊາສາຍລົມ, ໝູ່ບ້ານຊົນເຜົ່າ ແລະ ອື່ນໆ... ສິ່ງເຫຼົ່ານັ້ນແມ່ນໄດ້ສ້າງແຮງດຶງດູດ ແລະ ຈູງໃຈ ເອົານັກທ່ອງທ່ຽວທັງພາຍໃນ ແລະ ຕ່າງປະເທດ ເຂົ້າມາທ່ຽວຊົມ ເມືອງຜົ້ງສາລີ ນັບມື້ຫຼາຍຂຶ້ນ.

ແຫຼ່ງທ່ອງທ່ຽວພູຟ້າ.

ພູຟ້າ  ແມ່ນມິ່ງຂວັນເມືອງ ຂອງຊາວເມືອງຜົ້ງສາລີ, ຕັ້ງຢູ່ທິດຕາເວັນອອກສ່ຽງເໜືອຂອງຕົວເມືອງຜົ້ງສາລີ, ມີຄວາມສູງຈາກລະດັບນໍ້າທະເລ 1,625 ແມັດ, ມີຂັ້ນໄດຍ່າງແຕ່ຕີນພູຫາຈອມພູ 863 ຂັ້ນ ເຊິ່ງຢູ່ເທິງຈອມພູ ເປັນຈຸດຊົມວິວຂອງເທດສະບານເມືອງຜົ້ງສາລີ, ຊົມຕາເວັນຕົກ ແລະ ທະເລໝອກໃນຍາມເຊົ້າ, ພູຟ້າມີເນື້ອທີ່ທັງໝົດ 200 ເຮັກຕາ, ເປັນພູທີ່ອຸດົມສົມບູນໄປດ້ວຍປ່າໄມ້ດົກໜາ ແລະ ພືດພັນຫຼາຍສິ່ງຫຼາຍຢ່າງ ທັງເປັນພື້ນທີ່ອາໄສຂອງສັດປ່ານາໆສະນິດ, ໃນຂົງເຂດພູຟ້າມີເສັ້ນທາງສັນຈອນສະດວກດ້ວຍທາງເປຕົງ ແລະ ມີສະຖານທີ່ພັກຜ່ອນກວ້າງຂວາງ ເໝາະສົມແກ່ນັກທ່ອງທ່ຽວ ທັງພາຍໃນ ແລະ ຕ່າງປະເທດທີ່ຈະມາສໍາພັດ ແລະ ທ່ຽວຊົມ ເພື່ອພັກຜ່ອນຍ່ອນອາລົມ ແລະ ສູບເອົາອາກາດບໍລິສຸດ.

ສວນຊາ 400 ປີ.

ບ້ານກໍແມນ (ບ້ານລຸງຈິ້ງ) ເປັນບ້ານໜຶ່ງທີ່ຂື້ນກັບເມືອງຜົ້ງສາລີ, ມີໄລຍະທາງຈາກເທດສະບານເມືອງ 15 ກມ ເປັນບ້ານທີ່ມີປະຫວັດການປູກຊາລ້ຽງຊີບມາແຕ່ດຶກດໍາບັນ, ຕາມການເລົ່າຂອງຄົນເຖົ້າແກ່ອາວຸໂສຂອງບ້ານໃຫ້ຮູ້ວ່າ: ບ້ານກໍແມນນັບແຕ່ສ້າງຕັ້ງບ້ານແມ່ນມີອາຍຸປະມານ 400 ກວ່າປີ ແລ້ວ ແລະ ຕົ້ນຊາ ຊາວບ້ານກໍ່ໄດ້ປູກຕັ້ງແຕ່ເລີ່ມຕັ້ງບ້ານ ສະນັ້ນຊາວບ້ານຈຶ່ງເອີ້ນຊານີ້ວ່າ ຊາ 400 ປີ, ປະຈຸບັນຊາວບ້ານໄດ້ຖືການປູກຊາ ແລະ ຂາຍຊາເປັນອາຊີບຫຼັກ, ພາຍໃນບ້ານມີເນື້ອທີ່ສວນຊາ 32.25 ເຮັກຕາ, ມີກົກຊາທັງໝົດ 48,373 ກົກ ແລະ ເປັນຊາປູກທີ່ມີອາຍຸແກ່ທີ່ສຸດໃນ ສປປ ລາວ.

ປ່າ​ສະຫງວນ​ແຫ່ງ​ຊາດ​ນໍ້າຫ້າ.

ປ່າສະຫງວນແຫ່ງຊາດນ້ຳຫ້າ, ມໍລະດົກອາຊຽນ, ມີສັດລ້ຽງລູກດ້ວຍນ້ຳນົມ 38 ຊະນິດ ແລະ ມີສັດປ່າທີ່ຫາຍາກ ຈຳນວນ 22 ຊະນິດ. ປ່າສະຫງວນແຫ່ງຊາດນໍ້າຫ້າ ເປັນປ່າໄມ້ເຂດຮ້ອນ, ມີຄວາມຕຶບໜາ. ຄາດວ່າປະມານ 30% ຂອງເນື້ອທີ່ປ່າສະຫງວນ ຍັງເປັນປ່າດົງດິບ ແລະ 60% ເຄີຍຖືກຖາງ. ແຕ່ປະຈຸບັນ ໄດ້ກາຍມາ ເປັນປ່າໄມ້ທຳມະຊາດ ທີ່ເຕັມໄປດ້ວຍໄມ້ຫຼາຍຊະນິດ. 10 % ຂອງເນື້ອທີ່ ໄດ້ປ່ຽນເປັນດິນກະສິກຳ. ປ່າສະຫງວນແຫ່ງຊາດນ້ຳຫ້າ ຖືກແບ່ງເປັນ 3 ເຂດຄື: ເຂດຫວງຫ້າມເດັດຂາດ, ເຂດນຳໃຊ້ ເພື່ອການເກັບກູ້ເຄື່ອງປ່າຂອງດົງ ແລະ ເຂດເຮັດການກະສິກຳສຳລັບຊາວບ້ານ ຈຳນວນ 104 ບ້ານ ທີ່ດຳລົງຊີວິດ ຢູ່ໃນບໍລິເວນປ່າສະຫງວນ. ສັດປ່າທຸກຊະນິດມີການຫລຸດລົງ ຍ້ອນມີການລ່າເນື້ອ ແລະ ການຄ້າຂາຍສັດປ່າ. ຕົກມາໃນປີ 1999 ອົງການທ່ອງທ່ຽວແຫ່ງຊາດ ໄດ້ສົມທົບກັບຫ້ອງການທ່ອງທ່ຽວແຂວງຫລວງນ້ຳທາ ໂດຍໄດ້ຮັບການສະໜັບສະໜູນ ທຶນຊ່ວຍເຫຼືອລ້າ ຈາກປະເທດນິວຊີແລນ ໄດ້ເຂົ້າມາພັດທະນາການທ່ອງທ່ຽວແບບອະນຸລັກ ປະຊາຊົນມີສ່ວນຮ່ວມ ໃນນາມໂຄງການທ່ອງທ່ຽວອະນຸລັກນ້ຳຫ້າ, ໂດຍຜ່ານໄລຍະເວລາການພັດທະນາເປັນ 3 ປີ, ຈົນສ້າງຊື່ສຽງ ແລະ ກາຍເປັນຕົວແບບຂອງການພັດທະນາການທ່ອງທ່ຽວຢູ່ປະເທດລາວ ຈົນມາຮອດທຸກມື້ນີ້.

ແຫຼ່ງທ່ອງທ່ຽວບ້ານນ້ຳດີ, ເມືອງຫຼວງນ້ຳທາ.

ບ້ານ​ນ້ຳ​ດີ ຫ່າງ​ຈາກ​ເທດສະບານ​ແຂວງ​ ພຽງ 7 ກິ​ໂລ​ແມັດ, ຕາດ​ນີ້ ຊາວບ້ານໄດ້ຄົ້ນ​ພົບປີ 1995​, ຈາກ​ນັ້ນ ບ້ານ​ກໍ່​ພາກັນ​ອະນາ​ໄມອ້ອມ​ສະຖານ​ທີ່ ​ແລະ ຕັ້ງກຸ່ມ​ບໍລິການ​​ນັກທ່ອງທ່ຽວທີ່ເຂົ້າຊົມຕາດນ້ຳດີ ໄດ້ຈ່າຍຄ່າຜ່ານປະຕູເລັກນ້ອຍ ເພື່ອເຂົ້າທ່ຽວຊົມນ້ຳຕົກຕາດ.

ນອກນັ້ນ ຍັງມີຄ່າຝາກລົດຈັກ, ລົດຖີບ ແລະ ລົດໃຫຍ່. ເສັ້ນທາງເຂົ້າເຖິງນ້ຳຕົກຕາດ ມີຄວາມສະດວກສະບາຍ, ໃນແຕ່ລະວັນ ກໍ່ມີນັກທ່ອງທ່ຽວພາຍໃນ ແລະ ຕ່າງປະເທດ ເຂົ້າໄປທ່ຽວຊົມ. ທາງເຂົ້າຫານ້ຳຕົກ ມີ 2 ເສັ້ນ, ຢູ່ເບື້ອງລຸ່ມຂອງນ້ຳຕົກຕາດ ມີສາລາພັກຜ່ອນ. ນັກທ່ອງທ່ຽວ ສາມາດອາບນ້ຳຢູ່ກ້ອງນ້ຳຕົກຕາດໄດ້. ມີຮ້ານຂາຍເຄື່ອງດື່ມ ແລະ ເຄື່ອງຫັດຖະກຳ ຢູ່ຈຸດບໍລິການເຂົ້າຊົມ. ການ​ເຂົ້າ​ຫາ​ແຫຼ່ງທ່ອງ​ທ່ຽວນີ້​ ແມ່ນ​ເຂົ້າ​ໄດ້​ທຸກ​ລະດູ​ການ.

ນ້ຳຕົກຕາດ​ບ້ານ​ນ້ຳ​ທຸງ.

ນ້ຳຕົກຕາດ​ນ້ອຍ​ນ້ຳ​ທຸງ ຢູ່​ເຂດບ້ານນ້ຳ​ແດງ ໄປ​ຕາມ​ເສັ້ນທາງ ​ແລວ​ເສດຖະກິດ​ເໜືອ-​ໃຕ້ ຫ່າງ​ຈາກ​​ເທດສະບານ​ແຂວງ​ ປະມານ 18 ກິ​ໂລ​ແມັດ. ເສັ້ນທາງຫລວງ​ແຫ່ງ​ຊາດ​ນ້ຳ​ທາ - ນາ​ເຕີຍ, ອອກ​ຈາກ​ເສັ້ນທາງ​ໃຫຍ່ ຍ່າງ​ໄປ​ປະມານ 1 ກິ​ໂລ​ແມັດ (ເປັນນ້ຳຕົກຕາດ​ນ້ອຍ ທີ່ຢູ່​ໃນ​ຂອບ​ເຂດ​ດິນ​ສວນ​ໄມ້​ສັກ​, ຕົ້ນ​ຢາງ​ພາລາຂອງ​ປະຊາຊົນ ​ໃນ​ແຫຼ່ງນີ້ ບໍ່​ທັນ​ໄດ້​ຮັບ​ການ​ພັດທະນາ ​ແລະ ຍັງບໍ່​ມີ​ສິ່ງອຳນວຍ​ຄວາມ​ສະດວກ​).

ພະທາດ​ປູ​ມປຸກ.

ພະທາດປູມປຸກ ແມ່ນພະທາດທີ່ເກົ່າແກ່ທີ່ສຸດ ຂອງເມືອງຫຼວງນ້ຳທາ, ສ້າງຂຶ້ນໃນປີ ຄສ 1628 ເພື່ອເປັນ ສັນຍາລັກ ແຫ່ງມິດຕະພາບ ລະຫວ່າງ ເມືອງຫົວທາ ແລະ ເມືອງຊຽງແສນ. ພະທາດດວງເກົ່າ ໄດ້ຖືກຍົນອາເມລິກາ ຖິ້ມລະເບີດທຳລາຍ ໃນປີ 1966. ປະຈຸບັນ ຍັງມີຮ່ອງຮອຍເສດເຫຼືອຢູ່ຂ້າງພະທາດດວງໃໝ່. ພະທາດປູມປຸກ ຕັ້ງຢູ່ຫ່າງຈາກເທດສະບານແຂວງຫຼວງນ້ຳທາປະມານ 7 ກິໂລແມັດ. ທ່ານສາມາດຂີ່ລົດໂດຍສານ ຫຼື ລົດຖີບໄປເຖິງສະຖານທີ່ດັ່ງກ່າວໄດ້. ປະຈຸບັນ ຍັງບໍ່ທັນມີປ້າຍອະທິບາຍປະຫວັດຄວາມເປັນມາ ຂອງທາດດັ່ງກ່າວ. ບຸນພະທາດປູມປຸກ ຈັດຂຶ້ນໃນເດືອນກຸມພາຂອງທຸກໆປີ.

ອິງຕາມປະຫວັດສາດ ເມືອງຫຼວງຫົວທາ ບັນທຶກໄວ້ວ່າ: ມາເຖິງເດືອນ 6 ອອກໃໝ່ 13 ຄ່ຳ ປີ ເປິກສີ ຈສ 990 ຄສ 1628 ກົງກັບປີ ພສ 2171 ແມ່ນພະຍານາແລຕາໄຟ ທີ່ປົກຄອງເມືອງຊ້າຍ ຈັນທະບູລີ ແລະ ພະຍາ ສີສຸໂທທະນະ ທຳມີກະລາຊາ ແຫ່ງເມືອງຊຽງແສນ ໄດ້ຕົກລົງເຫັນດີນຳກັນໄດ້ນຳ ເອົາໄພ່ພົນທັງສອງ ເມືອງມາເມືອງ ຫຼວງຫົວທາ ເພື່ອກໍ່ສ້າງພະທາດຜູກໄມຕີກັນຂຶ້ນ 2 ດວງຄື: ດວງທີ 1 ສ້າງຂຶ້ນຢູ່ເທິງພູ ທາງທິດຕາເວັນຕົກສຽງເໜືອ ຂອງເມືອງຫຼວງຫົວທາ; ພະທາດດວງນີ້ ແມ່ນສ້າງຂຶ້ນໂດຍ ພະຍາສີສຸໂທທະນະ ທຳມີກະລາຊາ ເຈົ້າຜູ້ປົກຄອງເມືອງ ຊຽງແສນ ແລະ ຕັ້ງນາມພະທາດດວງນີ້ວ່າ "ພະທາດພູກຸກ ຫຼື ພະທາດພູປຸກ" ແຕ່ມາໃນໄລຍະຕໍ່ມາ ເອີ້ນວ່າ "ພະທາດ ປູມປຸກ ອິນທະລົງກາຣາຊາທະນີ" ມາຈົນເຖິງປະຈຸບັນ. ດວງທີ 2 ແມ່ນສ້າງຂຶ້ນຢູ່ເທີງພູ ທີ່ມີຊື່ວ່າ "ພູຜາສາດ" ຕັ້ງຢູ່ ທາງທິດຕາເວັນອອກສ່ຽງເໜືອ ຂອງເມືອງຫຼວງຫົວທາ, ປະຈຸບັນບໍ່ລິເວນດັງກ່າວ ແມ່ນຫ່າງຈາກບ້ານນ້ຳທຸງ 2 ກິໂລ ແມັດ ພະທາດດວງນີ້ ແມ່ນສ້າງຂຶ້ນໂດຍ ພະຍານາແລຕາໄຟ ຜູ້ປົກຄອງເມືອງຊ້າຍຈັນທະບຸລີແຫ່ງອານາຈັກລ້ານຊ້າງ.

ວັດ​ຫຼວງ​ຂອນ.

  ວັດຫຼວງຂອນ ແມ່ນຕັ້ງຢູ່ໃນບ້ານຫຼວງ, ເມືອງນ້ຳທາ, ແຂວງ ຫຼວງນ້ຳທາ. ຕັ້ງຢູ່ຕິດກັບເສັ້ນທາງຫຼວງ ຈາກເທດສະບານແຂວງ 6 ກິໂລແມັດ. ວັດຫຼວງຂອນ ແມ່ນວັດເກົ່າແກ່ວັດໜຶ່ງ ຢູ່ເມືອງຫຼວງນ້ຳທາ ໄດ້ຖືກສ້າງຕັ້ງຂຶ້ນ ໃນປີ ຄສ 1892 ໂດຍເຈົ້າ ຫຼວງກົມມະຈ້າງ ແຫ່ງເມືອງກຸສາວະດີ (ເມືອງເງິນໃຕ້).

ອີງຕາມເອກະສານ ປະຫວັດເມືອງຫຼວງຫົວທາ ຫຼື ເມືອງຫຼວງນ້ຳທາ ເວົ້າວ່າ: ພາຍຫຼັງເມືອງຫຼວງຫົວທາ ກາຍເປັນເມືອງຮ້າງ ໃນສະໄໝການປົກຄອງຂອງ ເຈົ້າໝ່ອມຫຼວງ ໂດຍ ເຈົ້າໝ່ອມນ້ອຍ ຜູ້ເປັນຫຼານຊາຍເຈົ້າໝ່ອມຫຼວງ ເຮັດສົງຄາມຍາດຊິງເອົາ ບັນລັງ ຂອງເຈົ້າໝ່ອມຫຼວງ ໃນປີ ຄສ 1733. ເຮັດໃຫ້ເມືອງຫຼວງຫົວທາ ກາຍເປັນເມືອງຮ້າງ ແລະ ເຈົ້າໝ່ອມຫຼວງ ກໍ່ໄດ້ຍ້າຍໄປຕັ້ງເມືອງໃໝ່ ຊື່ວ່າ "ເມືອງກຸສາວະດີ" (ເມືອງເງິນໃຕ້).

ພາຍຫຼັງເມືອງຫຼວງຫົວທາ ກາຍເປັນເມືອງຮ້າງໄດ້ 158 ປີ. ຈົນຮອດປີ ຄສ 1891 ກໍ່ໄດ້ມີເຈົ້າ ຫຼວງກົມມະຈ້າງ ເຈົ້າຫຼວງເມືອງກຸສາວະດີ (ເມືອງເງິນໃຕ້) ກໍໄດ້ພາຂຸນເສນາອາມາດຈໍານວນໜຶ່ງ ອອກຈາກເມືອງກຸສາວະດີ ມາເຖິງເມືອງຫຼວງຫົວທາ ໄດ້ພັກເຊົາຢູ່ແຄມນ້ຳແງ້ນ (ບໍ່ລິເວນຂົວນ້ຳແງ້ນປະຈຸບັນ) ແລະ ໄດ້ຈັດແຈງບ່ອນທີ່ຈະຕັ້ງເມືອງໃໝ່ ແລ້ວເຈົ້າຫຼວງກົມມະຈ້າງ ກໍ່ໄດ້ກັບຄືນສູ່ເມືອງກຸສາວະດີ ເພື່ອເຕົ້າໂຮມເອົາ​ເຈົ້າຂຸນມູນນາຍ, ບ່າວໄພ່ລາດຊະດອນຈຳນວນ 500 ຄົນ ແລະ ເສນາອາມາດ ຕິດຕາມອາລັກຂາຈຳນວນ 16 ຄົນ ແລະ ເຈົ້ານະຄອນນານ ເດີນທາງມາເມືອງຫຼວງຫົວທາ, ເຈົ້ານະຄອນນານ ຈຶ່ງຈັດເອົາສະກັນ ສົ່ງຫາບສົ່ງຫາມຕາມບ້ານຕໍ່ບ້ານ ຈົນຮອດບ້ານພ້າວກຸດຊຽງຂອງ ແລ້ວມີເຜົ່າລື້ຕິດຕາມມານຳອີກ ແລະ ໄດ້ຂ້າມແມ່ນ້ຳຂອງ ມາຫາບ້ານຫ້ວຍຊາຍ ແລະ ຜ່ານເມືອງຫຼວງພູຄາ ມາຮອດເມືອງຫຼວງຫົວທາ ໃນປີ ຄສ 1892. ຈາກນັ້ນ ຈຶ່ງໄດ້ຕັ້ງອາຮາມ ເຊິ່ງແມ່ນວັດຫຼວງຂອນ; ປະຈຸບັນ ມີສາທຸພໍ່ເຈົ້າຈັນຕະ ເປັນເຈົ້າອະທິການວັດ ແລະ ມີສາມະເນນ 2 ຕົນຄື: ເນນຈັນຍາ ແລະ ເນນນັນຕະ ພ້ອມດ້ວຍມັດສະທາຍົກສອງທ່ານ.

ພະທາດ​ຫຼວງ​ນ້ຳ​ທາ.

ຕັ້ງຢູ່ບ້ານໄຊສົມບູນ, ເມືອງ ແລະ ແຂວງຫຼວງນ້ຳທາ, ສ້າງສຳເລັດໃນປີ 2007. ໂດຍການຮ່ວມແຮງຮ່ວມໃຈ ຂອງເຈົ້າສັດທາຈາກປະຊາຊົນຜູ້ມີຈິດໃຈເຫຼື່ອມໃສໃນສາດສະໜາພຸດ ໄດ້ພາກັນສ້າງພະທາດດວງນີ້ຂຶ້ນມາ, ເພື່ອສັກກາລະບູຊາ, ໃນທຸກໆປີ ລະຫວ່າງເດືອນກຸມພາ ເພິ່ນຈະຈັດງານສະຫຼອງພະທາດຫລວງນ້ຳທາຂຶ້ນ ຢູ່ບໍລິເວນພະທາດຫຼວງນ້ຳທາ ໃນງານດັ່ງກ່າວ ມີການຄົບງັນເຄື່ອງອັດທະຂອງເຈົ້າສັດທາ, ມີການວາງສະແດງຜະລິດຕະພັນທ້ອງຖິ່ນ,  ທ່ານສາມາດເຂົ້າຫາແຫຼ່ງທ່ອງທ່ຽວດັ່ງກ່າວ ໄດ້ຢ່າງສະດວກສະບາຍ ແລະ ຈາກຈຸດດັ່ງກ່າວ ທ່ານສາມາດຊົມທິວທັດເທດສະບານແຂວງຫຼວງນ້ຳທາ ໄດ້ຢ່າງສວຍງາມ.

ນ້ຳຕົກຕາດ​ນ້ຳ​ແກ້ວ ເມືອງ​ສິງ.

    ແຫຼ່ງທ່ອງທ່ຽວນ້ຳຕົກຕາດ​​ແຫ່ງ​ນີ້ ຖືກ​ສຳຫລ​ວດ ​ແລະ​ ຄົ້ນ​ພົບ​ໂດຍ​ທິມງານວິຊາ​ການ​ຂອງ​ພະ​ແນ​ກທ່ອງ​ທ່ຽວ, ຫ້ອງການ​ທ່ອງ​ທ່ຽວ​ເມືອງ​ຫຼວງນ້ຳ​ທາ ໂດຍ​ທ່ານ ຄຳ​ລຽນ​ ຕັນຍາ​ແກ້ວ​ໃນ​ປີ 1998. ​ແຫຼ່ງທ່ອງ​ທ່ຽວ​ນີ້ ຕັ້ງຢູ່​ຂອບ​ເຂດ​ຂອງບ້ານ​ນ້ຳ​ແກ້ວ. ດັ່ງນັ້ນ ຊາວບ້ານ​ຈຶ່ງ​ເອີ້ນຕາມຊື່​ຂອງ​ບ້ານ​ຄື "ນ້ຳຕົກຕາດ​ນ້ຳ​ແກ້ວ" ບ້ານ​ນ້ຳ​ແກ້ວ ​ຫ່າງ​ຈາກ​ເທດສະບານ​ເມືອງ​ສິງ 10 ກິ​ໂລ​ແມັດ ​ແລະ ​ແຫຼ່ງທ່ອງ​ທ່ຽວ​ນ້ຳຕົກຕາດ​ນ້ຳ​ແກ້ວ ຫ່າງ​ຈາກ​ບ້ານ​ນ້ຳ​ແກ້ວ 10 ກິ​ໂລ​ແມັດ, ຫົນທາງ​ເຂົ້າ​ຫາ ​ແມ່ນ​ເສັ້ນທາງ​ຍ່າງ​ໄປ​ໄຮ່​ຂອງ​ຊາວບ້ານ, ນ້ຳຕົກຕາດ​ນີ້ ມີ​ລັກ​ສະນະ ​ເປັນນ້ຳຕົກ​ຜ່ານ​ຫີນຊັນ​ຫລາຍ​ໆຊັ້ນ, ຈະ​ເບິ່ງງາມ ແມ່ນ​ລະດູ​ຝົນ​ນ້ຳ​ຫລາຍ​, ອ້ອມ​ຮອບ​ບໍລິ​ເວນ​ນ້ຳຕົກຕາດ ຍັງມີທຳ​ມະ​ຊາດ ​ແລະ ໝູ່​ບ້ານ​ຊົນ​ເຜົ່າ ​ເປັນຕົ້ນ​ເຜົ່າ​ອາຄາ ທີ່​ຍັງ​ມີ​ວິຖີການ​ດຳລົງ​ຊີວິດ​ແບບ​ດັ່ງ​ເດີ່ມ. ດັ່ງນັ້ນ ໜ່ວຍ​ງານ​ບໍລິການ​ທ່ອງ​ທ່ຽວ ຈິ່ງສ້າງ​ເສັ້ນທາງ​ຍ່າງ​ປ່າ​ຊົມ​ທຳ​ມະ​ຊາດ​ ແລະ ວັດທະນະທຳ​ຊົນ​​ເຜົ່າ. ທ່ານສາມາດ​ຍ່າງ​ເຂົ້າ​ໄປ​ທ່ຽວ​ຊົມ​ໄດ້ 2 ວິທີ​ຄື: ​ໄປ​ທ່ອງ​ທ່ຽວ​ເອງ ​ໂດຍ​ບໍ່​ມີ​ການ​ຈ່າຍ​ຄ່າ​ສິ້ນ​​ເປືອງ​ໃດ​ໆ ເພາະວ່າ​ບໍ່​ທັນ​ມີ​ສິ່ງອຳນວຍ​ຄວາມ​ສະ​ດວກ​ເທື່ອ​ ​ຫຼື ຈະ​ຊື້ລາຍການ​ທ່ອງ​ທ່ຽວ​ ກັບ​ໜ່ວຍ​ງານ​ບໍລິການທ່ອງທ່ຽວ ທີ່ຕັ້ງຢູ່ເມືອງສິງກໍ່​ໄດ້.