ໜ້າຫຼັກ / ການເຄື່ອນໄຫວ / ກະຊວງ ວທ ຈັດກອງປະຊຸມປະເມີນການຈັດຕັ້ງປະຕິບັດກົດໝາຍ, ນິຕິກຳໃຕ້ກົດໝາຍ ປີ 2021-2025 ແລະ ທິດທາງແຜນການ ປີ 2026-2030
ໃນລະຫວ່າງວັນທີ 6-7 ພຶດສະພາ 2026 ນີ້, ທີ່ນະຄອນຫຼວງວຽງຈັນ , ຫ້ອງການກະຊວງວັດທະນະທຳ ແລະ ການທ່ອງທ່ຽວ ໃນນາມກອງເລຂາວຽກງານນິຕິກຳ ໄດ້ຈັດ “ກອງປະຊຸມປະເມີນ ການຈັດຕັ້ງປະຕິບັດກົດໝາຍ, ນິຕິກຳໃຕ້ກົດໝາຍ ປີ 2021-2025 ແລະ ທິດທາງແຜນການ ປີ 2026-2030” ຂຶ້ນຢ່າງເປັນທາງການ. ກອງປະຊຸມຄັ້ງນີ້ ໃຫ້ກຽດເປັນປະທານໂດຍ ທ່ານ ກິ່ງໄຊ ຈຸນລະມຸນຕຣີ ຮອງຫົວໜ້າຫ້ອງການ, ໂດຍມີບັນດາທ່ານ ຫົວໜ້າກົມ, ຮອງຫົວໜ້າກົມ, ຮອງຫົວໜ້າພະແນກ ວທ ນະຄອນຫຼວງວຽງຈັນ, ຫົວໜ້າ/ຮອງພະແນກຂອງກົມ, ຫົວໜ້າ/ຮອງຂະແໜງ ພະແນກ ວທ ນະຄອນຫຼວງວຽງຈັນ ພ້ອມດ້ວຍພະນັກງານ-ວິຊາການທີ່ກ່ຽວຂ້ອງເຂົ້າຮ່ວມ 40 ກວ່າ ທ່ານ.
ໃນໂອກາດກ່າວເປີດກອງປະຊຸມ, ທ່ານ ກິ່ງໄຊ ຈຸນລະມຸນຕຣີ ໄດ້ຍົກໃຫ້ເຫັນເຖິງຄວາມສຳຄັນຂອງວຽກງານນິຕິກຳ ຊຶ່ງເປັນເຄື່ອງມືທີ່ຈຳເປັນໃນການຄຸ້ມຄອງພາກສ່ວນຕ່າງໆ ທັງພາກລັດ ແລະ ທຸລະກິດ ນັບແຕ່ພະນັກງານລັດ, ຫົວໜ່ວຍທຸລະກິດ ຕະຫຼອດຮອດນັກທ່ອງທ່ຽວ ໃຫ້ປະຕິບັດຖືກຕ້ອງຕາມລະບຽບ ແລະ ມາດຕະຖານທີ່ວາງໄວ້. ພ້ອມນັ້ນ, ທ່ານຍັງໄດ້ຍົກເອົາທິດຊີ້ນຳຂອງທ່ານ ນາຍົກລັດຖະມົນຕີ ທີ່ໄດ້ໂອ້ລົມຕໍ່ຂະແໜງການ ວທ ທົ່ວປະເທດ ໃນວັນທີ 7 ເມສາ 2026 ຜ່ານມາ ແລະ ທ່ານ ລັດຖະມົນຕີ ໄດ້ມີຄໍາເຫັນ ແລະ ໃຫ້ຄວາມສໍາຄັນ ເພື່ອເປັນບ່ອນອີງໃນການຈັດຕັ້ງປະຕິບັດວຽກງານດັ່ງກ່າວໃຫ້ມີປະສິດທິຜົນສູງຂຶ້ນ.
ກອງປະຊຸມວິຊາການຄັ້ງທໍາອິດນີ້ ແມ່ນໄດ້ເປີດໂອກາດໃຫ້ຜູ້ຄຸ້ມຄອງມະຫາພາກ, ຕົວແທນຜູ້ຈັດຕັ້ງປະຕິບັດ, ພະນັກງານລັດ ແລະ ບັນດາກົມປິ່ນອ້ອມ ໄດ້ມາແລກປ່ຽນຂໍ້ມູນ, ຖອດຖອນບົດຮຽນ ແລະ ປຶກສາຫາລືຮ່ວມກັນຢ່າງກົງໄປກົງມາ. ຜູ້ເຂົ້າຮ່ວມໄດ້ຮັບຟັງການນຳສະເໜີຈາກບັນດາກົມທີ່ສ້າງນິຕິກຳໃນການຈັດຕັ້ງປະຕິບັດນິຕິກໍາ ແລະ ນິຕິກາໍໃຕ້ກົດໝາຍ ແລະ ແຜນການຕໍ່ໜ້າ, ຮັບຟັງການປະກອບຄຳເຫັນຈາກກົມກວດກາ ແລະ ພະແນກ ວທ ນະຄອນຫຼວງວຽງຈັນ ໃນຖານະຕົວແທນໃຫ້ແກ່ບັນດາແຂວງໃນທົ່ວປະເທດ ກ່ຽວກັບຂໍ້ສະດວກ,ຂໍ້ຫຍຸ້ງຍາກ, ສິ່ງໃນການຈັດຕັ້ງປະຕິບັດນິຕິກຳໃນຕົວຈິງ.
ໃນຕອນທ້າຍ, ທ່ານປະທານ ໄດ້ຮຽກຮ້ອງໃຫ້ຜູ້ເຂົ້າຮ່ວມທຸກພາກສ່ວນ ຈົ່ງພ້ອມກັນສຸມສະຕິປັນຍາປະກອບຄຳຄິດຄຳເຫັນ, ຖອດຖອນບົດຮຽນ ເພື່ອເຮັດໃຫ້ການສ້າງ ແລະ ປັບປຸງນິຕິກຳຂອງຂະແໜງການ ວທ ມີຄວາມສົມບູນ, ຄົບຖ້ວນ, ຮັດກຸມ ແລະ ສອດຄ່ອງເໝາະສົມກັບສະພາບການຂະຫຍາຍຕົວທາງດ້ານເສດຖະກິດ-ສັງຄົມ ໃນປັດຈຸບັນ.
